Text zu: "Bei da jetzign Zeit" - Handwerker-Liad

Die Kundschaft und die Auftraggeber beklagen sich über die Gepflogenheiten und Preise der Händler und der Handwerker - und über die schlechte Zeit überhaupt.

1. Bei da jetzign Zeit, da is nimma guat sei, / aufs Bessawern derf ma si a nimma freun. / 's wird allawei schlechta, wers net glabt, der laßts steh, / i wünsch halt an jedn, es soll eahm guat geh.
2. De Zeit, de ma jetzt habn, de hats no nia gebn, / da arbeitsamst Mensch woaß si gar nimma z'lebn, / i woaß net, is a Straf Gottes, oda san d'Leut so schlecht, / daß oana dem andern glei d'Haut aziagn möcht.
3. Beim Krama, da gehts scho o, wannst an Schnupftabak holst, / der schaugt allwei auf d'Waag hi, obs no net bald schnalzt, / und wannst net glei hischaugst, tuat er a bißl was weg, / daß er net z'kurz kimmt, Bruada, d'Leut san jetzt keck!
4. Oft amal ko'st scho an Kaufmann dafragn, / wannst einikimmst ko'st a paar Schneitztüachl habn, / a paar, a drei Zigarrn und zwoa Strängl Fadn, / des hoaßt ma am Land drauß an großn Kaufladn.
5. Und wann i an Maurer siech, wia stad daß er geht, / daß si bei eahm da Schaba kam hebt, / wia grob daß mit die Handlanga san, da mag i nix sagn, / da Mörtl is z'dick und d'Stoa kennas net recht tragn.
6. Bei die Bäck, liabe Leut, da is ar a wahrs Kreuz, / daß 's Brot no so kloa is, bei dem jetzinga Preis; / i woaß net, fehlts da am Gwicht, oda san d'Handerl so kloa, / daß d'Semmin und d'Loawin net wern, wia i moa.
7. Und wann i an Schneida siech, da graust ma schnell, / da werd halt de Luada da Zeug allwei z'schmal, / sie schneidn a weng auf und sie schneidn umanand, / und wannst nacha d'Sach holst, hat da Zeug nimma glangt.
8. Vo die Metzga, ja de Lumpn, da mag i nix redn, / ja weil oan de Spitzbuam ums Geld nix mehr gebn; / kafst dir a Pfund Fleisch, hast scho a Pfund Boa, / solln drei und vier langa, und fraß oana alloa.
9. Und de Schmied und de Wagna, de warn halt ganz recht, / de macha wenigstns 's Konto net schlecht; / wenns 's zammrechnan ofanga, da werds gar nimma gar, / da wünsch i de Bauern a glückseligs neus Jahr.

Qu: KP, S. 70, "Gesungen von Anni und Sepp Bauer, Gaissach bei Tölz." TA: Rosa und Sepp Linhuber, Eggstätt, 12.10.1991, Trachtenheim Hittenkirchen, TRL 0050.