Text zu: "Juhe, frisch auf"

Weitbekanntes schneidiges Wildschützenlied, in dem der Jäger unterliegt. In der Anfangsstrophe wird "freies Schießen" und "Alm gehen" in Verbindung gebracht.

1. Juhe, frisch auf zum Schiaßn frei, / und wer auf d'Alma geht, / wer im Wald stad umananda schleicht / auf d'Hirschlein und auf d'Reh. / 's Wildbratschiaßn is mei Lebn, / weil es tuat brav a Geld agebn, / ja 's Wildbratschiaßn is mei Freud, / drum grad is nimma leicht.
2. An Bamgartn drobn, da is recht schö, / da gibts brav Hirsch und Reh; / da sehgn mas scho vo weitn steh, / wenn mas hint aufi gehn; / da birsch i mi stad uma schön, / dawei siech i an Jaga stehn, / der schleicht sich halt zu mir daher, / bedroht mi mit sein Gwehr.
3. Jetzt schreit mi halt da Jaga o: / "He, Bursch, was machst du da? / Du hast mit koana Bix nix z'toa, / des Ding is net a so; / du muaßt di jetza mir ergebn, / du muaßt dei Bix vor d'Füaß herlegn, / du muaßt mit mir nach Tegernsee gehn, / da gehts da nimma schön!"
4. Nacha geama hoit mitanand schö stad / an Weg an Alpbach zua, / an Jaga hat da Durscht opackt, / er sauft eahm Wassa gnua, / i geh eahm no an seina Seit, / verlier koa Wort zu einem Streit, / aba auf oamal gib i eahm an Stouß ganz fei, / a Gumpn platscht a nei.
5. Und wia er halt da drinn is glegn, / da bitt er um sei Lebn, / i bin eahm halt no gnädi gwen / und habn net ganz datränkt. / Koan Huat, koan Rucksack und koa Bix, / der arme Jaga hat halt nix; / jetzt war a do bald narrisch worn, / hat gmoant, er hats valorn.
6. Drum mirkts es enk, es Jagasleut, / und laßts de Schützn steh / und seids net gar so voller Schneid, / es kunnt enk net guat geh. / A Wildschütz laßt si net mitführn, / hat koana ja an Dreck an Hirn, / sischt mach mas enk no allsamm recht, / es arme Jagasknecht.

Qu: KP, S. 86, "Vorgesungen von der Gesangsgruppe Kögl, beim 1. Preissingen 1930 in Egern am Tegernsee, Gasthaus zur Überfahrt. Steinmetzmeister Wackersberger in Tegernsee hat mir das gleiche Lied gegeben; da heißt der Wildschütz: Zacherl Toni! ... Viele Wildschützenlieder wurden geschrieben auf die gleiche Melodie; ich lasse den Text von zwei Liedern folgen: Suppenmoser Schütz, Teisendorfer Jagersknecht." TA: Ossi Hackl (Zither), Hannes Janßen (Baßgitarre), Lenggries, TH Hittenkirchen, 18.11.1992, TRL 0203