Text zu: Das Glasaug

1. Auf d'Augn muaß ma Obacht gebn, aufs Glasaug aber gar, / a solchas hat da Seppei ghabt, scho gwiß a siebn Jahr.
2. Auf d'Nacht tuat er's ins Wasserglas, des is er scho so gwohnt. / No ja, zum Schlafa bracht er's net, und 's Aug is besser gschont.
3. Amal, da kimmt a hoam mitn Rausch, er schlaft so furchtbar schlecht, / der Durst, der plagt'n scho a so, daß er was saufa möcht.
4. Da fallt eahm ei, er draht si um, glangt mit der Pratzn raus / und sauft in seinem mordstrumm Rausch des ganze Glasl aus.
5. Am andern Morgn, da steht er auf, sei Schädl is wia Blei. / "Ja so, mei Glasaug brauch i a", sagt er und suacht's halt glei.
6. Er schaugt und schaugt, da auf armal, da is er grantig wordn: / "Jetzt leckts mi aba glei am Arsch, jetzt hab i 's Aug verlorn!"
7. A zwoa Stund drauf, da jammert er: "Holts mir an Bader gschwind!" / Da Bader kimmt und fragt, wo's fehlt. "Ja mei, am Orschloch hint!"
8. Der Bader schaut eahm nei ins Loch, da packtn Angst und Graus: / "O Bruader", schreit er, "da schaug her, da linst ja oaner raus!"

Trad.: Slg. Kammerer, Burghausen. Abdruck: Couplets und Vortragslieder I, S. 14. Vorsänger: Franz Xaver Taubenberger (Holzkirchen).