Text zu: Da Geldbeutl is z'rissn ...

1. Da Geldbeutl is z'rissn / und d'Schliaßn varost! / Ja koa Wunder is net, / weil heit's Bier so viel kost.
2. Aba Musikantn, es Schwanz', / machts ma auf meine Tanz, / machts ma auf meine Witz, / wanns'es aufmacha kinnts!
3. Wo i dahoam bin, / hams an hölzern Kamin / und a zamgfallne Gred, / weil da Bua net hoamgeht.
4. A bißerl sikerisch, a bißerl sakerisch, / a bißerl vornehm muaß ma toa. / Große Zwanzger soll ma sehgn lassn - / aber hergebn derf ma koa.
5. D'Schnurrbart toa ma aufdrahn, / und d'Stiefl san rot, / und da Geldbeitl liegt an Heubodn hint / vor lauter Not.
6. A Schand is, wenn si oana / über d'Steuern beklagt, / wo a Hund scho vierzg Mark zahlt / und koa Wort dazu sagt.
7. Warums d'Erdäpfl erschaffa ham, / des woaß i jetzt scho: / daß da arm Teufi a oan hot, / den a d'Haut abziagn ko.
8. A Knödl hot koa Boa, / und a Frosch hot koa Haar, / und a Ochs ko net lacha: / des is ganz gwiß woahr.
9. A zwiedoppelts grüns Laberblattl / und a dridoppelts grüns Felbergartl / und a Zwiebelringl und an Stingl Kren / müaßn d'Deandl essn, na werns sche.
10. Wenn i des war, wos i gwen war, / war i a lustiga Bua, / kunnt i Fingahackln, kunnt i Damaschnackln - / Musikantn, pfeifts zua!

Jakob Roider (1906-1975), der "Roider Jackl" ist in Weihmichl bei Landshut geboren und lebte in Freising. Als Brautführer, Hochzeitslader und Gstanzlsänger war er in seiner Heimat und weit darüber hinaus bekannt - nicht zuletzt durch seine Auftritte im Bayerischen Rundfunk. Kurt Huber hat in seinem in den 30er Jahren erarbeiteten "Niederbayerischen Liederbuch" 15 Gstanzln des Roider Jackl abgedruckt (S. 104 ff.). Auf der folgenden Seite sind die fünf Gstanzl zum Thema "Hochzeit" abgedruckt, dazu ein instrumentales Nachspiel.

1. Aba mei liaba Hochzeita, / tua deine Eltern recht ehrn', / toats mitanand recht guat hausn / und hob dei Weiberl recht gern!
2. Da Hochzeiterin sei Vater / schaut fuchsteufelswild. / Entweder reut'n sei Tochta / oder es reut'n sei Geld.
3. Da Kranzljungfrau sei Kranzal / tuat wundaschö blüahn, / und der Bua, der's ihr ra tuat, / soll Arschprügl kriagn!
4. Heit bin i Brautführa, / hob a nix z'lacha, / soll i den ganzn Tag singa / und Faxn macha.
5. D'Hochzeitrin, de gfreut mi, / is bildauber und schneidi / und jung und hot a frisch Bluat, / und so a Ding macht eahm Muat.