Text zu: "Wia scheint denn heunt der Mond so schön" - 's Gsödbankl

In einem teils gesungenen, teils gesprochenen Dialog beschreibt ein Bua einem neugierigen Gesprächspartner seinen Fensterlgang mit all seinen Hindernissen, wobei wesentliche Inhalte durch den Jodler übergangen werden – zum Ärger des Fragenden.

1. Wia scheint denn heunt der Mond so schön, / sollt i a Trümmerl weita gehn, / wia scheint denn heunt der Mond so schön, / zum Dianal sollt is gehn.
   Gesprochen: Was hast na aftn ogfangt?
   Aft bin i hait außi in die schöne Wait, wo die schön Dianei san, und wia i oani gfundn hab, aft han i ogfangt.
   Was hast ogfangt?
   Holaradiria rieiho, holaradi holara, / holaradiria rieiho, holaradio.
2. Und wie i zu ihrn Fensta kimm, / schaugts außa mit sein Gsicht, woaßt wohl, / und sagt hait glei: "Mei liaba Bua, / mitn Schlafa is heut nix!"
   Gesprochen: Was hast na aftn ogfangt?
   Aft han i die lange Loata ogloahnt, bin aufi übas Labnbami übri, eini beim hintern Türl, übas Gsödbankl umi, durch den langa Gang füari, eini ins Kammerl, und wia i drinn war, deacht han i ogfangt.
   Was hast ogfangt?
   Holaradiria rieiho, holaradi holara, / holaradiria rieiho, holaradio.
3. Jetzt han i mi glei zuawi glegt, / glei zuawi glegt zu ihr, woaßt wohl, / aft fangts hait glei zum Kneaspitzn o, / a Trümmerl obern Knia.
   Gesprochen: Ja, was hats da imma kneaspitzt
   Ja, sie hat hait imma kneaspitzt und kneaspitzt, na han i aftn wieda ogfangt.
   Was hast ogfangt?
   Holaradiria rieiho, holaradi holara, / holaradiria rieiho, holaradio.
4. Da kimmt hait glei da Baua zwegn, / die Bäurin a dabei, woaßt wohl, / und ham ma glei a paar hint naufgebn, / ham gsagt: "Jetzt scherst di glei!"
   Gesprochen: Was hast na aftn ogfangt?
   Da kost no vui ofanga; da bin i außa ausn Bett und naus bei da Kamma übas Gsödbankl übri, naus beim hintern Türl, übri übas Labnbami und nunta üba d' Loata, und wia i drunt war, aftn han i wieder ogfangt.
   Was hast na ogfangt?
   Holaradiria rieiho, holaradi holara, / holaradiria rieiho, holaradio.

Qu: KP, S. 218-219, "Vorgesungen von Brunner Vater, Abwinkl bei Tegernsee, 1925. Vor 25 Jahren hörte ich dasselbe in Attenberg bei Schliersee von Lorenz Frankl bei der Christerbäurin." TA: VMA/TRL-0104; Sepp Linhuber, Meisham/Eggstätt und Franz Xaver Taubenberger, Holzkirchen; Gitarre: Eva Bruckner, Berchtesgaden; 4.11.1991, Eggstätt.