Text zu: "Arbeitslied"

Lange Aufzählung möglicher Arbeiten, die einen Dienstboten/Taglöhner treffen können

1. Fang is vo den glei o, / was i alls g'arbat ho; / sei tua is ziemlich alt, / ja und des sog i enk halt, / gwen bin i in an jedn Land, / g'arbat ho i allahand, / des sog i enk scho, / daß i gfeiascht nia ho.
2. Zerscht hots ghoaßen, nit gar zviel, / Flöh ausgfong aus da Hüll, / auskehrt und Mist austragn, / dann bin is mit de Goassei gfahrn, / Spinna ho i a probiert, / Bua, des Ding hot mi ogschmiert! / Triebn ho i sche stad, / oba no alls vadraht.
3. Küah triebn und Goaß ghüat, / Sau ghort und Schottn grüahrt, / Haar abgstutzt und grasiert / und mitn Ochsn Knittln gführt, / mit da Dirn Schottn gmacht, / ograhmt und grüahrt auf d'Nacht, / z'letzt, wia i enks sogn, / ho is Holz einitrogn.
4. Zauring gmocht, Besen baht, / Nadl eigfaht und weiß gnaht, / Lauba gkehrt, Mösa gmaht, / und e da Utz zäunt sche stad, / ho is an Weba gspuit und gschlicht / und dabei d'Liada dicht, / Holz ogschnittn und a gklobn, / in Winter hoamzogn.
5. Küahn und den Schafn gstraht, / Groamatl und Halma gmaht, / Äpfel und Kerschal brockt, / Nussal grad gnua aufklokt, / z'Wean ho is mit da Zitha gspuit, / Essig und Most eingfüllt, / der, der wos kennt, / ho is an hübschn Schnaps brennt.
6. Bin i amoi älta worn, / hob müassn mehras toan, / Erdäpfi gsetzt, Ruam obaut, / Kraut ghobelt und a ghaut, / San (Säen) hot mi eh nia gfreit, / wei is nia kunt ho gscheit, / gfahrn bin i mit da Eggn, / daß ma da Ochs is dalegn.
7. Kinda gwiag und a glockt, / Zimmat und Aneis klopft, / Schnee gschaufelt, Lampe gschert, / von Ratznfanga ho i a moi ghört, / Vöglfanga bin i a moi ganga, / ho glaubt, i derf glei drum glanga, / Bua, des Ding schmiert oan o, / sands ma all gflogn davo!
8. Gsod gschnittn, Heu aufbost, / Läus ho i kloa und groß, / Krebsn und Fröschal gfangt, / weils mi um ihre Haxerln blang, / Ochsn und Roß ogschürt, / Sagholz und Ladn ogführt, / bin i nach Salzburg gfahrn / mit sechs Roß in an Wagn.
9. Eis gschossn, Kartn gspielt, / Scheibn gschossn und a zielt, / mit da Geign a aufgmacht / beim Tag und bei der Nacht, / gsunga und gschampft dabei, / mitgmacht all Lumparei, / fort auf d'Nacht, hoam in da Früah, / blau gmacht no nia.
10. Woaz hob i droschn gnua, / Sansn hob i denglt guat, / Schöba und Haufn gmacht, / all Tag und a auf d'Nacht, / Erdbeer und Brombeer brockt, / Krapfal und Müassal kocht, / aba hiazt wißts es scho, / was i mei Lebtog ho to.

Qu: KP, S. 48, "Bekommen vom 12jährigen Windhofer Schorschl, St. Johann im Pongau"
TA: Hannerl und Fredl Wallner, Trachtenheim Hittenkirchen, 13.10.1991, TRL 0065